Mykines – Eitt Ramsar-øki

Mykines er eitt Ramsar-øki. Ramsar er ein altjóða sáttmáli um vernd av mýrlendi, sum eisini fevnir um fuglabjørg. Slík øki skulu verða umsitin burðardygt, náttúran varðveitast, og tiltøk skulu gerast fyri at verja umhvørvið. Vegna vaksandi trýst frá ferðafólki úr øllum heiminum, sum vilja vitja hetta viðkvæma økið, eru trygdartiltøk sett í verk fyri at avmarka talið av vitjandi og verja djóralívið.

Reglur fyri gongutúrar á Mykinesi

Av umhvørvisávum er avmarking sett á talið av ferðafólki. Í mesta lagi 200 fólk kunnu vitja hagan hvønn dag, og tað er bert loyvt at ferðast í haganum millum kl. 10:00 og 17:00. Uttan fyri hesar tíðir er økið stongt, og vitjan í hagan kann bert fara fram eftir avtalu við jarðareigararnar.

Gongutúrar á Mykinesi – Bert við ferðaleiðara

Fyri at ganga í haganum á Mykinesi er neyðugt at keypa ein túr við góðkendum føroyskum ferðaleiðara.

Ein túrur, sum jarðareigarafelagið skipar fyri, har bæði gongugjald og ferðaleiðari eru íroknað, kostar 400 kr, um hann verður bílagdur á hiking.fo í seinasta lagi dagin fyri. Um goldið verður á staðnum, er kostnaðurin 500 kr. (Gjald verður kravt av øllum yvir 15 ár).

Tú kanst eisini seta teg í samband við ein staðkendan ferðaleiðara ella eina føroyska ferðaskrivstovu, sum selur túrar til Mykines. Minst til at kanna, um gjaldið er íroknað. Øll ferðafólk, sum vitja Mykines við ferðaskiparum ella øðrum veitara, skulu vera í fylgi við góðkendum føroyskum ferðaleiðara. Útlendskir ferðaleiðarar uttan arbeiðsloyvi í Føroyum hava ikki loyvi at leiðbeina á Mykinesi. Ferðaskiparar og onnur, sum ynskja loyvi at skipa fyri túrum á Mykinesi, skulu venda sær til jarðareigarafelagið á oynni.

Vitin á Mykineshólmi

Vegna vernd av lundunum í reiðringartíðini er gøtan til Mykineshólm og vitan stongd um summari. Í økinum Lamba er eisini vandi fyri skriðulopi. Hetta merkir, at alt økið longur enn útsýnisstaðið á Rógvu er stongt.

Tó eru nógvir møguleikar at síggja lundar, og vitin kann síggjast væl frá útsýnisstaðnum á Rógvu.