Mykines er tann einasta bygdin á oynni við sama navni. Í bygdini eru meira enn 40 hús, men bert umleið 15 fólk búgva har alt árið (dagfest 2023).

Í seks mánaðir av árinum er einasta sambandið til og frá oynni við tyrlu. Av tí at eingin handil er á oynni, verða neyðugar vørur fluttar við tyrlu um veturin. Frá apríl byrjar ferjan at sigla tríggjar ferðir um vikuna. Um summari siglir hon tvær ferðir um dagin. Onnur smærri bátafeløg sigla eisini við ferðafólki. Um hetta tíðarskeiðið koma nógv fólk til Føroya, og talið av vitjandi fólki í Mykinesi veksur munandi. Oyggin er bilfrí, so ferðslan fer fram til gongu.

Mykines er eitt av teimum støðunum í Føroyum, sum nógv ferðafólk vitja. Oyggin hevur óbygd øki og nógv fuglalív. Hon er skrásett sum Ramsar-øki, og har verpa m.a. lundar og súlur. Mykines er einasta staðið í Føroyum, har súlan verpur. Eisini eru aðrir sjófuglar á oynni, eitt nú lomvigi, álka og rita. Nógv ferðafólk koma at síggja fuglarnar, serliga um summari.

Eitt kent stað er vitin á Mykineshólmi, sum er knýttur at høvuðsoyggini við eini brúgv. Fyri at avmarka árin av vaksandi ferðavinnu eru ymisk tiltøk sett í verk. Endamálið er at verja náttúruna og taka atlit til fólkini, sum búgva á oynni. 

Trýst her fyri kunning áðrenn vitjan!

inspired by

Mykines