Gøtan millum Argir og Krikjubø er onnur farleiðin, ið knýtir Havnina og Kirkjubø saman. Hetta er farleið, ið ikki er eins nógv brúkt og hin gøtan, ið byrjar í Havnardali, og sum var vanliga farleiðin, tá ið farið varð  millum Kirkjubø og Havnina. Bygdagøtan, ið knýtir Argir og Kirkjubø saman, varð m.a. brúkt, tá ið kirkjubøfólk skuldu á sjúkrahúsið í gomlum døgum. 
Stórur partur av leiðini er grýtut lendi, ið ger tað torført at síggja nakra sjónliga leið. Tí er tað avgerandi at hava gpx-fílu, sum tryggjar, at tú finnur røttu leiðina. Varðar eru á leiðini, men tað ber ikki til at dúva á teir, tí í summum førum eru teir “falskir” varðar, ið liggja nakað burtur frá upprunaligu bygdagøtuni.

Hetta er ein vøkur og heldur sjáldsom farleið við grýtutum lendi, nógvum klettum og summastaðni næstan mánakendum umhvørvi. Eisini verður gingið fram við vakra Porkerisvatni, har tað er upplagt at steðga á eina løtu at njóta umhvørvi. Tað sigst, at William Heinesen, kendi føroyski rithøvundurin og listamaðurin, hevur fingið nógvan íblástur til sínar tekningar frá sínum gongutúrum her á Kirkjubøreyni. Kendu tekningarnar av trøllum sigast m.a. hava íblástur hiðani.